Украинскиот претседател, Петро Порошенко апелира Русија да ги повлече своите сили од Украина.
-Ве молам да го прекинете огнот и да ги ослободите заложниците. Ве молам повлечете ги своите сили од мојата територија – рече Порошенко во Сиднеј.
Тој оцени дека повлекувањето на руските сили од украинска територија би довело до воспоставување на мир.
-Ве молам затворете ги границите. Ветувам дека во рок од една, две или три недели ќе имаме мир и стабилност во Украина. Тоа е многу едноставно -наведе украинскиот претседател, кој доби поддршка во Сиднеј за овој судир.
Инаку ситуацијата на исток на Украина е мирна по договорот за прекин на огнот кој стапи на сила во среда.
Мировните преговори за прекин на судирите помеѓу украинската војска и проруските бунтовници, кои требаше да бидат одржани во Минск се одложени, а новиот датум не е соопштен.
Ова е четврто примирје за време на осуммесечните судири во Украина, во тек на кои според ОН загинаа повеќе од 4.300 лица, а повеќе стотици илјади ги напуштија своите домови.
Е. Г.