Помладата сестра на севернокорејскиот лидер Ким Џонг Ун, е поставена на висока функција во единствената политичка партија во Северна Кореја, соопштуваат државните медиуми во Пјонгјанг.
Ким Јо Јанг за која се верува дека се уште нема 30 години, е поставена за заменик директор на едно влијателно партиско тело во Севернокорејската комунистичка партија.
Таа досега немаше никаква партиска функција, но често се појавуваше со својот брат на разни службени настани, во главниот град, или во внатрешноста на земјата.
Актуелниот лидер на партијата и на земјата, Ким Јонг Ун е третата генерација од семејството Ким кое изминатите децении управува со Северна Кореја, што е започнато со неговиот дедо Ким Ил Сунг, а потоа продолжено со таткото Ким Јонг Ил, кој почина во 2011 година.
Тетката на Јонг Ун исто така имаше значајна позиција во партиската хиерархија, но таа целосно исчезна од јавноста, откако нејзиниот сопруг, тетинот на севернокорејскиот лидер, беше уапсен, а потоа и егзекутиран,со обвинување дека е „предавник“.
Се верува дека сестрата со добивањето на политичка функција ќе треба да игра голема улога во обезбедувањето поддршка за братот, во неговото безбедно одржување на лидерската позиција.
Сестрата Ким Јо Јанг прв пат се појави во домашната јавност, на погребот на нивниот татко пред три години.
Таа, како и Ким Јонг Ун и постариот брат Ко Јонг Хуи се образувани во еден интернат во Швајцарија, но Јонг Хуи нема никаква функција и тој не се појавува во јавноста.