Директорот на Светска банка Џим Јонг Ким денеска предупреди дека епидемијата од ебола во Западна Африка може да предизвика глад и апелираше на создавање на меѓународен фонд за епидемија.
Тој истакна дека еден од четворица фармери во најпогодените земји – Либерија, Сиера Леоне и Гвинеја го запреле садењето на нивите.
– За една година би можеле да се соочиме со глад, посочи Ким и се заложи за глобален договор на чело со СБ или некоја друга организација за обезбедување на фондови во случај на итни потреби поради пандемијата.
Тој наведе дека богатите земји би учествувале со поголем дел во фондот, од сиромашните, но оти „секој би имал свој удел“.
Според податоци на Светската здравствена организација од ебола починале 5.177 луѓе додека околу 14.500 се заразени од избивањето на епидемијата во декември минатата година.