„Верувам во мирот и стабилноста како основа за одржлив развој. Во тој дух, евро-атлантските интеграции ги гледам како најдобро алтернатива за иднината на Република Македонија и Балканот”, порача министерот за одбрана Фатмир Бесими на промоцијата на новата Бела книга на одбраната.
Целите на оваа Бела книга, како што објасни Бесими, е сеопфатно и транспаретно преставување на постигнувањата, идните планови и предизвици на безбедносната и одбранбена политика на Македонија.
Читателите, како што посочи министерот за одбрана, во Белата книга ќе најдат целосна слика и широк спектар на систематизирани информации и податоци во сите области од одбраната денес.
„Меѓу другото, во Белата книга се даваат нашите гледишта кон безбедносното опкружување; се реафирмираат државните интереси и вредности; се говори за постигнувањата во одбраната; се информира за националниот придонес во глобалната и регионалната безбедност и стабилност; претставени се долгорочните одбранбени развојни цели, потребите за ресурси, како и визијата за натамошен развој на одбраната”, рече Бесими.
„Изградбата на современа, ефективна и интероперативна армија подготвена да се справи со предизвиците на 21-от век е темелна одредница на визијата за натамошен развој на одбраната. Визија за развој на одбраната ја претставуваме во оваа нова Бела книга на одбраната”, рече Бесими.
„Иднината зависи исклучиво од нас – граѓаните на Република Македонија, од нашата посветеност да се соочиме со предизвиците и да го искористиме целиот свој потенцијал за подобрување на животниот стандард и квалитетот на живеење, односно да ја направиме Македонија подобро место на живеење. Македонија, земја на еднаквите, земја меѓу еднаквите во НАТО и во ЕУ”, порача министерот Бесими.