Во малите и средни претпријатија во Србија од 2009 година досега е намален бројот на вработени за речиси 200.000, од 582.409 на денешните 385.934, објави Блиц.
Координаторот на Форумот за мали и средни претпријатија, Александар Грачанац вели за весникот дека причините се намалена побарувачка, вложувањата, порастот на трошоците на вложување, хронична неликвидност, пораст на сивата економија како и порастот на парафискалните трошоци.
– Здравата претприемачка политика почна да се губи и се поголем е бројот на фирми што згаснуваат. Србија во 2009 година имала 266.242 микро, мали и средни фирми додека денес се регистрирани 217.000, објаснува Грачанац.
Тој потсетува дека според показатели на ЕУ, Србија е во групата на држави кои се умерени иноватори со перфоманси под просек, а по показатели на квалитет на претприемништво, освен БиХ, е најслаба во регионот.
Тој додава дека и измените во Законот за ДДВ дополнително придонеле за затворање на малите фирми бидејќи ДДВ се плаќа по фактурирањето.
– И Законот за рокови за плаќање за жал е мртов бидејќи меѓу најголемите должници беше државата. Неликвидноста продолжува, а голем број мали и средни фирми буквално банкротираа поради неможноста да се изборат со неликвидноста, потенцира Грачанац.