Изјавата на српскиот министер за труд Александар Вулин, дека САД „кои го контролираат Хашкиот трибунал“, го пуштиле од затвор лидерот на радикалите Воислав Шешељ и оти „сега преку него зборуваат дека ќе ја уриваат српската влада“, во американската амбасада во Белград го толкуваат како „неоснована теорија на завера“, пишува весникот „Данас“.
– Во тоа апсолутно нема вистина. Меѓународниот кривичен суд за поранешна Југославија е основан под покровителство на СБ на ОН, а процесите кои во него се водат се заштитени од политичко влијание, се истакнува во соопштението на амбасадата на САД.
Како што се наведува, САД ја поддржуваат важната работа на Хашкиот суд, но не влијаат на неговите одлуки или мислење.
– Секое поинакво толкување е невистинито, се наведува во соопштението.