Околу 44 илјади евра биле украдени вчера од куќата на А.М.(67) што се наоѓа на улица „Цветан Димов“ во Тетово информираше портпаролот на СВР Тетово, Марјан Јосифовски.
Според неговите податоци, засега непознати сторители вчера во периодот меѓу 9 и 20 часот додека немало никого во куќата насилно ја отвориле дрвената влезна двокрилна врата по што од кожена женска чанта што ја нашле во спалната соба на катот одзеле повеќе парчиња златен накит, ќустеци, алки, лири, комплет ланчиња, како и поголема сума евра и швајцарски франци и незабележни од никого ја напуштиле куќата.
– Според пријавата на сопственикот, вкупната штета од оваа тешка кражба изнесувала 43.900 евра. Полицијата извршила увид при што пронашла и подигнала одредени траги за вештачење и работи на откривање на сторителите, рече Јосифовски.
Ова е втота тешка кражба во полошко оваа недела откако пред неколку денови од куќа на жител на гостиварска Долна Бањица била одземена поголема количина златен накит во вкупна вредност од околу 70 илјади евра.
Јосифовски посочи дека една од активностите на СВР Тетово во овој период се и состаноците со граѓаните и граѓанските советодавни групи во тетовско- гостиварскиот регион посветени токму на самозаштитата на граѓаните од провални кражби.
Во досега одржаните триесеттина состаноци една од главните препораки до граѓаните е соодветно да ги обезбедат своите пари и накит доколку подолго време отсуствуваат од домовите, рече Јосифовски.