Станарите на зградата од Македонија број 16, да размислат и сами да изберат помеѓу решението на Град Скопје и на општината Центар. Ова вечерва на состанок со нив, им го кажа градоначалникот на општина Центар Андреј Жерновски.
Тој рече дека не сака да го коментира предлогот на Градот, туку само ќе обрзложи што може општината Центар да направи за станарите.
-Ние ви нудиме енергетски ефикасна фасада, а изгледот на зградата нема да се менува во друг стил, туку ќе остане сосема ист, како што е сега. Реновирањето ќе биде од сите страни, а не само од предната страна на зградата. Јас не сакам никого да убедувам, ниту да кажувам кое решение е добро или лошо, единствено сакам да ви појаснам што би направила општината Центар доколку се одлучите за нашето решение, а вие ќе го имате последниот збор, рече Жерновски.
Станарите и Жерновски се договорија од понеделник да работат група од општината и претставниците од зградата на писмен документ во кој ќе детално ќе биде објаснето што планира и што може Центар да понуди и што се ќе биде финансиски покриено од општината.
По тоа, останува станарите да одлучат-дали ќе се определат за предлогот за барок фасада од предната страна или пак за оригиналната фасада на зградата од сите страни, која ја нуди Центар.
Станарите не постигнаа досега согласност со Градот Скопје за барок фасада. Тие негативно одговорија и по дополнителниот рок од десет дена кој Градот им го понуди да се предомислат.