Македонското еколошко друштво (МЕД) денеска, на Пониква, на Осоговски Планини, ја организираше манифестацијата „Осогово – и лично и различно 3“. Поводот на овој настан е да се истакне значењето на буковите шуми на Осоговските Планини, а воедно и промоција на целиот Осоговски регион.
– Ова е трета по ред манифестација за промоција на Осогово, организирана од повеќе организации, а под координација на Македонското еколошко друштво. Учествуваа 150 деца од училиштата од регионот, граѓани и други заинтересирани лица вљубеници во природата. Во рамките на овој настан беа реализирани повеќе активности пред сè, промовирање и прошетка по новопоставената едукативна патека во букова шума, поставување информативни табли на неколку локации долж патеката, споделување дополнителен информативен материјал и промовирање на едукативниот пакет подготвен за училиштата, изјави Деспина Китановска од МЕД.
Манифестацијата „Осогово–и лично и различно“ се реализира во соработка со општините Кочани и Пробиштип, Шумското стопанство Кочани, како и претставници од невладините организации: Зелени патеки од Пробиштип, Електрика, ВК Поскок, и ПСД Осогово од Кочани, асоцијацијата Слоу фуд Осогово, Центарот за карпеста уметност од Кратово, а зедоа учество и поединци занаетчии, претставници од угостителските објекти кои работат на Пониква, нудејќи спецјалитети од Осоговскиот крај.