„Со предлог Буџетот за 2015 година Владата на Никола Груевски продолжува да ги намалува средствата за потребите на одбраната и припадниците на АРМ.
Оваа власт повеќе пари потроши за споменикот на камената Фаланга отколку за Армијата на Република Македонија.
Во последните 8 години, Владата на ВМРО-ДПМНЕ префлила над 60 милиони евра од буџетот на одбраната, на други буџетски ставки“, изјави на денешната прес-конференција Горан Сугарески, пратеник и член на Комисијата за одбрана, СДСМ.
„Со овие пари:
– ќе се набавеа униформи и војнички чизми коишто им се неопходни на војниците.
– можеше да се изградат станови за припадниците на Армијата.
– можеше да се вработат планираните 250 војници за оваа година кои останаа да чекаат пред вратите на Министерството за одбрана.
– ќе се купеа и 30 оклопни транспортери.
Дополнително, власта не ги реализираше проектите за реконструкција на објектите Свети Наум и Попова Шапка, а пропадна и проектот АРМ – Мој вистински дом.
Минатата 2014 година, речиси целиот буџет на одбраната се потроши за плати за вработените (околу 70%). Немаше и се уште нема пари за опремување и модернизација на Армијата.
Ќе потсетиме дека во Заклучокот од Самитот на НАТО, во септември, се укажа дека минимумот на одвојување за одбраната треба да биде 2% од БДП, а од тие средства барем 20% да бидат за модернизација и опремување.
Буџетот на одбраната денес изнесува фрапантни 1.1% од БДП. Ова го потврдува крајно несериозниот однос на власта кон Армијата и припадниците на АРМ“, рече Горан Сугарески.