Во Неготино денеска беше отворено советувалиште за брак и семејство кое ќе работи во склопот на Центарот за социјална работа во овој град.
Директорката на Центарот Роза Јаневска се заблагодари на Владата и Миннистерството за труд и социјална политика што вакво советувалиште се отвора во градот, но и на градоначалникот на Неготино за отстапената просторија.
– На граѓаните им нудиме нова социјална услуга. Ние и претходно работевме на оваа проблематика со семејства во кои има нарушени односи, но, сега ќе понудиме и нив пристап со цел надминување на нивните проблеми, рече Јаневска.
Таа нагласи дека советувалиштето е отворено и за сите други граѓани, а овде, рече, ќе се реализираат и предбрачни совети, совети за малолетнички бракови, како и превентивни програми.
– Сакаме здрави и квалитетни семејства кои се столб на општеството, додаде Јаневска.
Отворањето на Центарот го поздрави и градоначалникот на Неготино Ванчо Апостолов.
– Од една страна ја поздравувам оваа хумана иницијатива на Центарот, а од друга страна посакувам стручните тимови да имаат што е можно помалку работа бидејќи бракот и семејството се светост и треба да ги негуваме и одржуваме, рече Апостолов.