Женската ракометна репрезентација на Македонија е на половина од подготовките за претстојните два дуела со Италија од квалификациите за Светското првенство 2015 година. Селекторот Ристо Магдинчев бара претпазливост за првиот предизвик во овие квалификациите.
– Имаме видео материјали од последните натпревари на Италија. Таа може да биде незгоден противник, па затоа треба внимателно да играме на двете средби. Оваа селекција не е од типот на Русија и Германија, од претходните квалификации, но мора да бидеме внимателни. Со дел од ракометарките работевме и претходно особено со оние кои настапуваат во странство, а беа порано дојдени во Скопје, истакна Магдинчев.
Дуелите со Италија и потоа со Исланд ќе бидат вистинска проверка за подмладената репрезентација на Македонија која има просек нешто над 22 години. Последна на подготовките денеска треба да се една од најискусните во репрезентацијата Елена Ѓорѓиевска.
Натпреварот Македонија – Италија се игра в четврток во СРЦ „Кале“ во Скопје.