Сите обвинети во процесот „Шпион“ добија затворски казни-од условна и една година затвор, до три години за Ване Цветанов и 15 години за првообвинетиот Марјан Ефремов. Тој од Обвинителството беше прогласен за главен на групата која шпионирала за странски разузнавачки служби, но и уценувала и вршела изнуди. На Ефремов му беа досудени 15 години затвор поради неколку кривични дела : злосторничко здружување, шпионажа, уцена, изнудување и прикравање.
Георги Хаџи Мицев доби казна од една година затвор, а Слободан Милошевски, кој пред судот призна дека е виновен помина со условна казна. На поранешниот генерал Горан Стојков судот му одреди 9 години затворска казна за изнуда, недозволено држење оружје и злосторничко здружување.
Ване Цветанов, поранешен директор на Управата за спречување перење пари за злосторничко здружување и злоупотреба на службената положба доби три години затвор. Поранешниот шеф на кабинетот на претседателот на Собранието, Марјан Маџовски е осуден на една и пол година затвор за злоупотреба на службената положба и уцена.
Тој, Ване Цветанов и уште тројца до правосилноста на пресудата ќе бидат на слобода, со оглед дека судот им го укина притворот.