Она што некогаш беше далечно и недостижно, на дванаесет студенти од Македонија ова лето им беше на дофат на рака. Тие добија сосема нова димензија на летото – 1 месец патуваа низ Европа и ја промовираа Македонија.
Граѓанската асоцијација МОСТ и студентите кои патуваа, ќе го заокружат утревечер овогодинешниот Пат во Европа. Покрај изложбата, студентите ќе бидат тука преку есеи да раскажат за своите импресии, а ќе биде прикажан и краток филм од почетокот на патувањето.
Во организација на Граѓанска асоцијација МОСТ и со поддршка на донаторите на проектот, студенти од завршните години на факултетите низ Македонија, еден месец имаа можност да патуваат низ Европа и да се запознаваат со градовите, луѓето и обичаите. Оваа регионална активност, веќе осма година се реализира со цел да се претстават земјите од кои доаѓаат студентите во Европа, но и да се споделат стекнатите искуства помеѓу граѓаните.