Раководството на најголемата чешка енергетска компанија ,,ЧЕЗ” потврди дека поради преструктуирање на компанијата ќе отпушти околу шест проценти од вработените, јави дописникот на МИА од Прага.
Според директорот на полудржавниот гигант, Даниел Бенеш, отпуштањето на околу 1.500 вработени, како и намалување на бенефитите на останатите, над 25.000 работници ќе биде преземено заради потребата од штедење иако фирмата се уште работи добро. Во последно време ,,ЧЕЗ” се соочува со проблеми, поврзани со нејзиното проширување во југоисточна Европа, од каде компанијата почна да се повлекува.
Неодамна од ,,ЧЕЗ” беше најавен интерес за преземање на дветретински удел во најголемиот производител на електрична енергија во Словачка како и учество во полската енергетска компанија.
Рестриктивните мерки, ,,ЧЕЗ” ги презема поради намалувањето на цената на електричната енергија предизвикана според Бенеш од ,,несовладливиот проект” на европската енергетска политика.
– Во Европа се зборува за либерален енергетски пазар, но истовремено секоја земја си создава свои услови и дотациски програми, рече Бенеш, додавајќи дека на тој начин пазарите не се соединуваат туку се распаѓаат. Бенеш најави дека цената на електричната енергија би се зголемила по 2016 година, а порастот ќе се забрза по 2020 година.