Проруските сепаратисти од источна Украина денеска соопштија дека започнале со повлекување на своето артилериско оружје, согласно договорот постигнат во Минск.
– Ја повлековме артилеријата од зоните од кои е дислоцирано и оружјето на украинската регуларна армија. Таму каде што украинската артилерија на е повлечена, не ја повлековме ни нашата, изјави лидерот на проруските сепаратисти од Доњецк, Александар Захарченко.
Тој нагласи дека е повлечено оружјето на артилериските единици со калибар од над 100 милиметри.
Како што јави ИТАР-ТАСС, повлекувањето на артилериското оружје е предвидено со договорот од девет точки, склучен во саботата во Минск, за ставање крај на судирите помеѓу украинските сили и проруските сепаратисти, кои траат повеќе од пет месеци.
Со договорот се предвидува создавање на тампон зона во широчина од 30 километри, долж линијата на фронтот меѓу украинските сили и сепаратистите и повлекување на тешката артилерија, што според аналитичарите го замрзнува конфликтот на сегашните позиции.
Планот предвидува и итен прекин на огнот, кој за ега се почитува, како и забрана за авионски летови над сепаратистичките региони.