Музика, убаво вино и дружење, ова го подготвува Општина Центар за утрешното отворање на Боемската улица во Дебар Маало. Отворањето е во 20:00 часот.
Со ова општината освои уште една пешачка зона. Боемската улица е пешачка зона, на која кафеанџиите, уметниците и сите кои имаат добра идеја ќе си го најдат местото и просторот каде што ќе се искажат.
Новото решение на улицата „Ѓорѓи Пешков“ е трансформација во амбиентална пешачка зона со ниски станбени објекти, куќи со дворови и гостилници со вкупна површина од 2.000 метри квадратни. Импровизираните рампи ќе спречат паркирање на возила.На улицата се поставени коцки, кои не се нови, туку земени од неколку растурени улици во Скопје.
Од двете страни на улиците има комбинација од стар и нов дрворед од 24 дрвја до кои е доведена инсталациа за полевање со систем капка по капка. Осветлувањето е со 15 гусени декоративни фенери. Денеска беше донесен и пајтон, но само како украсен . Тој е позајмен, за да се види како ќе го прифатат посетителите.
Дебар Маало, вели градоначалникот на општина Центар Андреј Жерновски е боемската душа на Скопје.
Улицата на 17.09.2014, едно од изборните ветувања на Жерновски и новото општински раководство, ќе биде отворена за граѓаните, претставена како проект и идеја за еден нов начин на живот во Дебар Маало.
Боемскиот живот сугерира едноставен живот, кој на некој начин се спротивставува на зацртаните морални и културни норми и очекувањата на пошироката заедница.
Со своето име повикува секој да го најде боемот во себе, да ја слушне музиката, да напише куса порака на обична хартиена салфетка, или да запее со уличниот музичар заборавена песна.