Вчера, по 15-ти пат, се вршеше вонреден инспекциски надзор во општината, на барање на Друштвото за Сервисирање, Трговија и Услуги „Никофон“, кој што е воедно и инвеститор на изградбата на катната гаража.
„Никофон“, со пријавување во управниот инспекторат врши притисок врз општината за да започне со изградбата на гаражата бидејќи, инвеститорот за секое барање до општината испраќа и барање до управна инспекција.
Деталниот урбанистички план е донесен во 4 часот наутро од претходниот состав на Советот на општина Центар и со него парцелата на која беше предвидено паркирање на едно ниво, се измени и беше дозволено изградба на катна гаража, која порасна од 3 на 29 метри.
Во текот на постапката, Дирекцијата за заштита и спасување во 2 наврати издаде негативно мислење по однос на проектот, бидејќи не беа исполнети стандардите за заштита при пожар и евакуација на населението и немаа влез и излез од гаражата по што експресно беше сменет правилникот според кој “Никофон“ не ги исполнуваше условите, информираат од општина Центар.
Жителите на ова место реагираат, тие велат дека не сакаат катна гаража со оглед на фактот дека на 20 метри веќе има изградено друга катна гаража.
Т.Ц.