За претстојниот верски општински и државен празник Успение на Пресвета Богородица (Голема Богородица) денеска и во наредните два дена во Берово се одвиваат голем број културни настани и економски манифестации.
Општинското раководство, претставниците на Македонската православна црква – Охридска архиепископија и на бизнис-секторот утре очекуваат рекорден број гости. Тие ќе учествуваат на традиционалниот „Етно плоштад фестивал“ и на саемот на еколошки и традиционални производи на кои се изложуваат повеќе видови традиционална храна, ракотворби, сувенири и уметнички дела.
Градоначалникот на Берово Драги Наџински информираше дека на фестивалската сцена со традиционален фолклор ќе настапат неколку ансамбли, фолклорни групи и инструменталисти од Македонија и од соседните Србија и Бугарија.
Домашните и странските гости со особено внимание го очекуваат настапот на Андријана Јаневска и „Митан проект“ и „Љубојна брас фантази“. Предвиден е настап и на тамбурашкиот оркестар при Домот на културата „Јане Сандански“, како и концерти на поп-пејачите The Shtekica, Влатко Илиевски, Кристина Арнаудова и други.
За време на празничните денови ќе се одржува и традиционалната туристичко-стопанска манифестација. Според изјавите на неколкумина туристички работници, Берово и беровци со широко отворени врати на своите домови и срца ги очекуваат и традиционалните гости од дијаспората, што веќе направиле резервации во хотелите и во приватните сместувачки капацитети во градот и во туристичките центри на Беровско Езеро, Абланица , Бела вода, Кукута.