Во рамките на проектот за реконструкција на фасадите во општина Центар, завршена е и петтата фасада. Зградата на улица “ Пиринска” спроти Соборниот храм, за прв пат по земјотесот во 1963 год. темелно е реконструирана, доби термичка изолација и нови бои без да се промени претходниот изглед на фасадата.
Објектот има интересна приказна што е регистрирано на фотографии од пост земјотресно Скопје. Зградата била напукната и вратена во живот, благодарение на стратегијата колективните згради да бидат спасувани, на сметка на инвидуалните, со цел да се сместат што повеќе луѓе назад во своите домови, да се штедат сили, време и пари и да се насочат кон она што конечно ќе го спаси градот. Дилемата била дали да се напушти локацијата на градот со оглед на ризикот од нови земјотреси што би значело пораз од природна стихија.
Решено е и Скопје е спасено, затоа е оваа зграда за Центар многу значајна. Кога ќе се спореди изгледот на зградата некогаш и сега се гледа главната интенција на општина Центар да се зачуваат автентични архитектурата и боите.
Средствата за реконструкција на фасадата се одвоени од буџетот на општина Центар за оваа година.
