Откако ги кренаа граѓаните на нозе и споменаа дека смртоносната бактерија се наоѓа во колбасите и меленото месо, сега надлежните институции велат дека бактеријата листерија не се криела таму, пишува во соопштение на СДСМ.
„До кога граѓаните ќе бидат заложници на половичните информации на државните институции дека бактеријата ја има, но не се знае каде? Уште колку им е потребно на институциите да кажат кои се вистинските причинители на смртоносната бактерија? Ако се земе предвид предупредувањето од одделението за следење и надзор на заразните болести, коешто регистрирало смртност од дури 42,9 отсто, повисока од таа во европските земји во последните неколку години, за што и било алармирано, тогаш каде се досега надлежните со точна информација?“, прашуваат од СДСМ.
Според партијата, нетранспарентноста на надлежните, дополнително ја зголемува неизвесноста кај граѓаните.
„И пред утрешниот празник кога голем дел од граѓаните ги посетуваат туристичките места во Македонија, се лишени од информацијата што смеат, а што не смеат да јадат.Вака граѓаните се ставени во ситуација да не јадат основни прехранбени производи. Се сомневаат дури и во водата што ја пијат, а веќе два месеца нема резултати што е изворот на смртоносната бактерија“, се додава во соопштението на СДСМ.
СДСМ бара сериозност, одговорност и објаснување на овие прашања, со цел елиминирање на сите шпекулации и сомнежи кај јавноста.