Евроатланските интеграции остануваат приоритет во работата на Владата. Италијанското претседателство со ЕУ е значајно за регионот во актуелниот контекст по европските избори, а важна е и проактивната поддршка на Италија на напорите на Македонија за почеток на преговори со ЕУ.
Ова го истакнал премиерот Никола Груевски на денешната средба со министерката за надворешни работи на Република Италија, Федерика Могерини, заблагодарувајќи се за досегашната поддршка на Италија во однос на овие суштински процеси.
Како што соопшти владината прес-служба, на средбата соговорниците го изразија задоволството од развојот на односите и соработката меѓу Република Македонија и Република Италија и воедно посочија подготвеност за нивно натамошно унапредување и интензивирање во сите области од взаемен интерес.
Премиерот Груевски ја истакна заложбата за продлабочување на економската соработка, како и проширување на секторската соработка.
– Премиерот Груевски истакна дека Италија е мошне значаен трговски партнер, и досега земјата има позитивно искуство од реализацијата на неколку инвестиции што докажува дека има потенцијал, кој може да биде искористен во насока на јакнење на трговските и економските односи меѓу двете пријателски држави. На средбата беа истакнати и полињата каде може да се соработува, потенцирајќи ја областа на трговијата, енергетиката, земјоделството и образованието, се вели во соопштението.
Соговорниците изразија надеж и подготвеност за интензивирање на соработката и продлабочување на взаемните билатерални и економски односи.