Судот во Хаг изрече пресуда според која Холандија е виновна за смртта на повеќе од 300 жртви во геноцидот во Сребреница. Во пресудата се истакнува дека холандските мировни трупи не го заштитиле бошњачкото население кое се наоѓало во оваа енклава под заштита на Обединетите нации.
„Холандија е одговорна за загубата што ја претрпеа членовите на семејствата кои босанските Срби ги депортираа од заштитената енклава во Поточари во 1995 година“, стои во пресудата.
Сепак, ова е само делумна сатисфакција за околу 8.000 жители на Сребреница, кои во тужбата пред граѓанскиот суд во Хаг ги обвинија холандските „сини шлемови“ дека не ги презеле соодветните чекори за да го спречат масакрот, во кој беа убиени повеќе од 8.000 луѓе.
Со пресудата се прифаќа одговорност за само 300 од овие загубени животи.
Обединетите нации ја прогласија Сребреница за безбедно подрачје за цивили во 1993 година. Но по две години опсада, енклавата ја зазеде Ратко Младиќ со неговите трупи, по што илјадници бошњаци побараа заштита во Поточари, каде беа сместени холандските мировници.
Мировниците предале во рацете на војската на Република Српска повеќе од седум илјади мажи и деца, кои биле убиени.