На денешната седница на Советот на Град Скопје, советничката група на СДСМ и коалициските партнери даде предлог за бесплатен автобуски превоз за лицата без родители и родителска грижа, и откако ќе наполнат 18 години, односно се до нивното прво вработување.
Мнозинството на ВМРО-ДПМНЕ без дискусија го одби овој предлог.
Наместо бесплатен превоз на овие лица, обезбеден е попуст за превозот од 50 проценти, соопшти СДСМ.
Партијата обвини за негрижа, оти парите што би се потрошиле за таа намена би биле многу помалку од 15,5 милиони евра наменети за Панорамското тркало.
„Со ова Коце Трајановски покажа дека само декларативно се грижи за граѓаните, бидејќи предлогот на опозицијата за бесплатен превоз ќе имаше минимални импликации врз Буџетот, а огромна ќе беше помошта за оваа категорија граѓани.
Предлогот за бесплатен превоз за лицата без родители е одбиен во време кога Коце Трајановски и мнозинството на ВМРО-ДПМНЕ се луксузираат со панорамско тркало од 15.500.000 евра“, порача најголемата опозициска партија.