Група од околу 50- тина стечајци денеска се упатија да протестираат пред Владата, откако лидерката на стечајците Лилјана Георгиевска не успеа да оствари средба со претседателот на Сојузот на синдикатите Живко Митревски.
По приемот во Синдикатот, таа изјави дека разговарала единствено со секретарот на ССМ, при што и било речено да испратат нивни предлог закон за стечајците и тие ќе проценат дали тој треба да претрпи некакви измени и надополнувања.
Како што рече Георгиевска, нивните барања остануваат непроменети – трајно згрижување на стечајците со минимум 15 години работен стаж и 50, односно 53 години старост за жени и мажи.
– Македонија е единствена земја во светот каде полицијата ги спроведува стечајните работници во зграда на Синдикатот. Сепак, договоривме средба нашиот предлог закон да го доставиме до Синдикат и да разговараме дали се потребни корекции, за да може Синдикатот да го предложи на Владата и на Економско социјалниот совет. Што се однесува до годините, можеме да разговараме за измени и дополнувања – изјави Георгиевска.
Според Георгиевска, стечајните работници кои се обештетени според актуелниот закон ги бараат да одат на работа во Кавадарци и Гевелија и да работат во фабрики.
– Им се закануваат дека нема да земаат паричен надоместок, ако не прифатат да работат. Доста ни е со популистичките мерки на Владата, затоа се и протестите – изјави лидерката на стечајците.
Протестот започна пред зградата на ССМ, од каде стечајците тргнаа кон Владата.
Петар Клинчарски