„Искривена“ или „крива“ шума која се наоѓа покрај градот Грифин во Полска, е позната по своите криви стебла. Иако постојат многу теории кои се обиделе да го објаснат овој феномен, вистинската причина се уште не е позната.
Во оваа шума се наоѓаат околу 400 борови кои растат искривени под агол од 90 степени, а кај повеќето од нив тоа закривување е насочено кон север. Уште почудно е тоа што овие стебла се опкружени со уште поголема шума каде дрвјата растат на вообичаен начин.
Се проценува дека стеблата се засадени околу 1930 година и дека биле стари меѓу седум и десет години кога нешто ги искривило. Ова се некои досегашни објаснувања што би можело тоа да биде.
Некои сметаат дека гравитацијата е причина која стои позади невообичаената форма на дрвјата. Сепак, не постои никаков доказ кој би ја потврдил оваа теорија, а меѓу другото, гравитацијата на предметите ги повлекува надолу, а не на страна.
Нешто поверојатна, но и понатаму многу неверојатна теорија наведува дека големи количества снег ги израмнувале стеблата низ долг временски период додека се уште биле мали. Но, и тоа е многу спорно сценарио, затоа што стеблата во околната шума растат совршено нормално.
Едно од популарните објаснувања на овој феномен е дека во текот на инвазијата на Полска во Втората светска војна, непријателски тенкови поминувале низ шумата и ги срамниле младите стебла со земјата. Стеблата повторно израснале, но искривени. Но, повторно се поставува прашањето зошто е искривен само еден мал дел од шумата?
Исто така, се сомнева дека и човекот е виновник што овие стебла растат на овј начин. Ова објаснување има смисла затоа што сите искривени стебла речиси се идентични. Во тоа време, фармерите саделе стебла кои ги обликувале и користеле за изработка на мебел или бродови.
Гратчето Грифин беше уништено во текот на војната и повторно беше обновено дури во 70-те години од минатиот век, кога на тоа подрачје е изградена електрана.