ВМРО – ДПМНЕ и Градоначалникот Коце Трајановски ги намалуваат средствата за клучните проекти од интерес на граѓаните на Скопје, рече Предраг Трпески, советник во Советот на Град Скопје.
Се кратат средства за изградба на јавно осветлување за 16%, за изградба на магистрални и собирни улици за 21%, за изградба на сообраќајна сигнализација за 27%. Големо е намалувањето на средствата за секторот образование кое изнесува 24%.
Средствата за реализација на проектот Подземна сообраќајница, во износ од 90 милиони денари, со ребалансот на буџетот во целост се бришат. Со ова Градоначалникот Трајановски на граѓаните на Скопје практично им соопшти дека овој проект нама да се реализира и дека целта на истиот била само да се искористи во кампањата за локалните избори 2013 година.
Од друга страна, со ребалансот се зголемуваат трошоците за набавка на мебел, за луксуз од проектот Скопје 2014, за изградба на катни гаражи. Па дури се додаваат и нови ставки, како што е на пример набавката на Пајтон, која Градот Скопје ќе ја субвенционира со 2,6 милиони денари.
Ваквата политика на градоналчалникот Трајановски за нас е неприфатлива и претставува политика на непотребно луксузирање, на штета на граѓаните на Скопје, очигледно во интерес на бизнис зделките на власта, вели Трпески.