Никола Груевски ја има најголемата одговорност за иднината на Република Македонија, по криминалниот изборен процес и политичката криза во којашто ја внесе државата, реагира СДСМ откако ВМРО-ДПМНЕ претходно во соопштение ги нарече „криминалци“ лидерот на СДСМ Зоран Заев и заменик-претседателката на СДСМ, Радмила Шекеринска.
„Го повикуваме боксерот Никола Груевски да сфати дека осма година не е во бокс арена, туку на чело на власт којашто ја уништува иднината на сегашните и идните генерации“, се додава во реакцијата на СДСМ.
Претходно, ВМРО-ДПМНЕ испрати соопштение во кое напиша:
„Криминалците Зоран Заев и Радмила Шекеринска, за кои постојат безброј евидентни докази дека живеат во енормен луксуз, стекнат на нечесен и незаконски начин, откако добија бокс од меѓународната заедница за нивното политичко однесување и откако доживеаја огромен пораз од 200 000 гласови на последните избори, очигледно е дека она што имаат намера да го прават е да работат за туѓи интереси, кои се штетни за Република Македонија. Заев и Шекеринска веќе не знаат во кој правец тераат и што прават“.
