Претседателот на Социјалдемократскиот сојуз на Македонија, Зоран Заев и генералниот секретар на партијата, Оливер Спасовски денеска остварија средба со заменик министерот за надворешни работи на Италија, Бенедето Дела Ведова и италијанскиот амбасадор во Македонија, Ернесто Масимино.
На средбата се разговараше за актуелната политичка ситуација во Македонија, за изборните нерегуларности и проблемите со избирачкиот список, како и за предлозите на СДСМ за надминување на политичката криза.
Претседателот Заев посочи дека Македонија се соочува со режимска власт, необјективни медиуми, преклопување на државата со институциите, инструментализизирано судство.
Неправилностите на изборите и заканите и притисоците, нотирани и во Извештајот на ОБСЕ/ОДИХР, спречија слободен израз на волјата на граѓаните, поради што СДСМ го напушти Парламентот.
За да се реши оваа политичка ситуација бараме формирање техничка влада којашто ќе создаде услови за фер и демократски избори и за функционални институции. На тој начин институциите ќе можат и непристрасно да се справуваат со криминалното и корупцијата во земјата, посебно кога тој доаѓа од врвот на власта, рече претседателот Заев.
Заменик министерот Дела Ведова посочи дека во агендата на Италија, како земја којашто од 1-ви јули годинава ќе го превземе претседавањето со ЕУ е напредување на Балканот. Во таа насока препорачуваат надминување на кризата и решавање на отворените прашања со цел стабилност и напредок на земјата.