Тешките товарни возила над 10 тони и со ознака ТИР нема да се движат низ подрачјето на град Штип, е одлуката што денеска е донесена од страна на општината, информира портпаролот на Општина Штип, Драган Ристов.
Тој посочи дека граѓаните, кои имаат потреба за утовар-истовар на стока на подрачјето на град Штип, и донесување или носење градежни материјали поради изведба на градежни работи, а кое се врши со тешки товарни возила над 10 тони, да се обратат во одделението за комунални дејности на општина Штип за добивање дозволи за движење на подрачјето на Штип.
– Измената на сообраќајниот режим е затоа што голем дел од посочените тешки товарни возила од над 10 тони, се паркираат на изградени и неизградени површини, во градското подрачје, кои не се за таа намена, а со самото тоа создаваат и сообраќаен хаос, вели Ристов.
Тој додава дека општината ги повикува сопствениците на тешките товарни возила над 10 тони да ги отстранат од централното подрачје и во иднина да се придржуваат на воведената измена на сообраќајниот режим.
