Тројца поранешни припадници на т.н. Дреничка група на ОВК притворени поради обвиненија за воени злосторства на Косово, побегнаа од болница во Приштина, каде биле на лекување, потврди денеска вршителот на должност на корективната служба на Косово Шемси Хајризи, јави Танјуг.
Хајризи потврди за косовски медиуми и за Радио Слободна Европа (РСЕ) дека Сами Луштаку, Исмет Хаџа и Сахит Јашари побегнале.
Косовски медиуми јавуваат дека полицијата не можела да ги најде во собите на КБЦ Приштина Луштаку и останатите двајца.
Од петнаесет обвинети од Дреничката група, седум беа во притвор од 31 мај минатата година.
Припадниците на Дреничката група се обвинети за воени злосторства врз цивилно население, вклучувајќи тортура, злоставување и убиства за кои се претпоставува дека се извршени во наводниот центар за притвор на ОВК во селото Ликовце во 1998.