Седум национални театри ќе гостуваат на првиот Меѓународен театарски фестивал во организација на Македонскиот народен театар, а со поддршка на Министерството за култура, што ќе се одржува од 25 мај до 5 јуни. Гостуваат претстави во изведба на ансамблите на националните театри на Грузија, Бугарија, Азербејџан, Црна Гора, Хрватска, Србија и Велика Британија.
Директот на МНТ, Дејан Лилиќ, на прес конференција, денеска, го најави првото издание на Меѓународниот театарски фестивал – МНТ. Идејата за фестивалот, како што рече, е стара две години, а произлегува од фактот дека сите национални театри делат исти предизвици, а фестивалот ќе биде место каде што ќе се презентираат вистинските театарски вредности.
-Нашата идеја е фестивалот да овозможи презентирање на различните сценски естетики и подобро меѓусебно запознавање и се разбира отворање на поголеми можности за посериозна взаемна соработка во иднина и размена на искуства, вели Лилиќ.
Во рамки на фестивалот на сцената на МНТ ќе гостуваат националните театри од седум држави, меѓу кои и британскиот ‘Глоуб театар’ кој има четиривековна традиција. Ансамблот на лондонскиот театар ќе го затвори фестивалот со претставата ‘Хамлет’ во режија на Доминик Дромгул и Бил Бакхарст која ќе биде изведена во два термини, попладне и вечер.
На сцената на МНТ ќе бидат изведени и следните претстави: ‘Како што милувате’ во изведба на грузискиот национален театар ‘Коте Марџијанишвили’ во режија на Леван Цулазде (25-ти мај), потоа ‘Лет над кукавичкото гнездо’ во изведба на бугарскиот народен театар ‘Иван Вазов’, во режија на Александар Морфов (27-ми мај). Националниот театар на Азербејџан ќе ја изведе претставата ‘Мене…нас…’ во режија на Гунер Сатај (28-ми мај), Црногорско народно позориште ќе ја изведе претставата ‘Everyman Dzilas’ во режија на Радмила Војводиќ (29-ти мај), Хрватскиот народен театар ќе ја изведе претставата ‘Медеја’ во режија на Томаж Пандур (31-ви мај), а ансамблот на српскиот народен театар ќе ја изведе претставата ‘Народен пратеник’ во режија на Саша Габриќ (03-ти јуни).
Во рамки на фестивалот ќе бидат одржани работилници и предавања на кои ќе присуствуваат и актерите и режисерите на претставите.
Картите од утре ќе бидат пуштени во продажба на билетарата на МНТ, а ќе чинат 300 денари, освен за претставата ‘Хамлет’ која ќе чини 500 денари.
Министерството за култура за фестивалот одвои буџет од 49 илјади евра, а фестивалот ќе се финансира и од средства на МНТ.
