Сообраќајот на патниот правец Штип-Велес е нормализиран откако утрово беше во прекин, по сообраќајната несреќа меѓу шинобус-воз и автобус.
Во несреќата повредени се најмалку 32 лица. На Клиничката болница во Штип пренесени се 16 патници кои се во стабилна состојба. Од нив, 11 моментално се на Одделот за хирургија, а еден патник поради повреда на рбетот е испратен на клиниките во Скопје.
Во болницата во Велес пренесени се уште 16 патници од кои тројца со потешки телесни повреди се испратени во Скопје. Од нив, еден е неконтактибилен, а другите се со повреда на кичмата и ребрата. Двајца се пуштени на домашно лекување, а останатите се на хирургија и им се спроведуваат прегледи. Меѓу повредените е и една бремена жена која е во добра состојба.
Директорот на „Македонски железници Транспорт“ Оливер Дерковски, денеска изјави дека сигналните уреди на железницата биле во ред односно функционирале. Првичните индиции, како што посочи, покажуваат дека возачот на автобусот поминал на спуштени рампи, на обезбеден премин железнички премин.