На плоштадот во центарот на украинскиот град Одеса дојде до масовни судири предизвикани од околу 1.500 радикални приврзаници на киевските власти и навивачи на локалниот фудбалски клуб „Черноморец“, јави ИТАР-ТАСС.
Млади луѓе со маски и ленти со натписи „Десен сектор“, вооружени со синџири, стапови и штитови се обиделе да одржат марш низ централните улици на градот скандирајќи „Слава на Украина“, „Смрт на непријателите“ и „Русите на нож“.
Против нив тргнала колона од активисти на организацијата „Куликово поле“, која обвинува за узурпирање на власта во Украина и се залага за референдум за федерализација на земјата и признавање на рускиот јазик за официјален.
Наспроти обидите на полицијата да ги раздели групите, меѓу учесниците во двата протести избиле судири во кои биле употребени димни бомби и палки. Судирите се прошириле и биле фрлени и неколку „молотови коктели“, при што се оштетени паркирани возила, а повредени се и неколку минувачи и новинари.
Според очевидци, има повредени и меѓу учесниците на протестите и меѓу полицијата. По улиците на градот се поставени и барикади.