Украинскиот министер за внатрешни работи Арсен Аваков побара од приврзаниците на федерализацијата на земјата „да го предадат оружјето и да ги ослободат заложниците“, соопшти прес службата на МВР, цитирана од ИТАР-ТАСС.
„Министерот за внатрешни работи ги соопшти барањата на Антитерористичкиот центар: итно предавање на оружјето, итно ослободување на сите заложници, ослободување на сите заземени административни згради, прекин на безредијата и прогоните. Украинската власт е подготвена да ги амнестира учесниците во граѓанското востание и окупирањето на административните згради, кои не извршиле тешки насилни кривични дела“, се наведува во соопштението на прес службата.
Барањата за разоружување и предлозите за преговори беа соопштени откако киевските власти рано утринава почнаа специјална операција во Славјанск, во која досега се уништени два хеликоптера „Ми-24“ и оштетен е трет – военотранспортниот „Ми-8“, забележува ИТАР-ТАСС.
Локалните медиуми соопштуваат и за тројца убиени: двајца украински војници и еден претставник на народната одбрана на самопрогласената „Доњецка Народна Република“.