Лицата со даунов синдром треба поактивно да бидат вклучени во здравствениот систем, во процесот на консултирање при прегледите (кое најчесто се одвива преку нивните родители или старатели).
Потребни се одредени услуги (опрема, лекови) за тие лица, како и поедноставни бирократски процедури во доаѓање до некои услуги кои им се загарантирани со закон.
Ова денеска го истакна Росица Колева, член на Здружението за помош и поддршка на лица со Даунов синдром „Трисомија 21“, која рече дека за стандардните операции, како што е онаа на AV канал која е типична кај лица со даунов синдром, тие се уште се испраќаат во странство. Потенцира дека има одредени антикоагуланси кои ги нема и треба да ги нарачуваат од странство.
– Даунов синдром е состојба хромозомопатија која се јавува како резултат на неделење на хромозомите на процесот на клеточна делба. Тие луѓе имаат 47 наместо 46 хромозоми во клетките и како резултат на тоа имаат одредени физички карактеристики специфични за нив, интелектуална попреченост од различен степен и придружни здравствени проблеми – проблеми со срцето, тироидна жлезда, бели дробови, рана појава на алцхајмерова болест итн.
Дауновиот синдром се јавува кај едно од 800 до 1.000 живородени, додаде Колева.
Марија Матовска од НВО Хера рече дека недостига прирачник, материјал, кој едно лице со даунов синдром или со некоја друга интелектуална попреченост ќе го прочита и ќе се информира за својата состојба, за своите права.
Здружението за помош и поддршка на лица со Даунов синдром „Трисомија 21“ денеска одржа презентација на тема „Еднаков пристап до здравствени услуги и информации за лица со попреченост“ на која стана збор за заклучоците од конференцијата на тема „Еднаков пристап до здравствени услуги“, која се одржала на 21 март во седиштето на Обединетите нации.