По седницата на централниот комитет на ВМРО-ДПМНЕ, официјално не беа соопштени детали од дебата и ставовите, освен дека продолжуваат со принципиелната политика и дека со коалициската ДУИ ќе продолжат разговорите.
Порталот ОхридСкај , од партиски извори, објави информациите дека врвот на партијата пред патот во странство дал неколку точки по кои треба да се раководат членовите на ЦК. Тоа според порталот е, да се избегнува на најавената средба со Ахмети било каков договор, кога Груевски ќе замине во САД, пратеничката група да ја отвори комисиската расправа за Законот за бранители, но да не се затвора, по враќањето од САД, на Ахмети да му се соопшти дека е потребна медијација од странските амбасади .
Едно од решенијата за да се спаси ситуацијата е Законот за бранителите да се изгласа, но да почне да важи од средината на 2013. Според порталот, амандманите на ДУИ би биле тогаш вметнати, што значи и ОНА ќе влезе во Законот, а Груевски говорел за есенски парламентарни избори и локални на пролет.
Доколку Ахмети би се согласил со овие услови, Груевски ќе бара во септември распуштање на Парламентот. Присутните, наведува изворот на порталот биле убедени дека владина криза нема да има, а за тоа посебна гаранција имало од Муса Џафери и од скопското крило на интегративците.
