Украинските сили синоќа нападнаа голема руска рафинерија за нафта во Волгоград и производствен погон во Ростов на Дон, објави „Киев Индепендент“. Нападите со беспилотни летала се случија само еден ден по трилатералните мировни преговори во Абу Даби.
Со нападите Украина ја продолжува кампањата насочена кон руската енергетска инфраструктура, која ја снабдува руската армија и придонесува за приходите на Москва од енергетскиот сектор.
Ukrainian drones struck a major Lukoil oil refinery in Volgograd and a production facility in Rostov-on-Don overnight, triggering fires and explosions. https://t.co/0qUPQUDGI5
— Clash Report (@clashreport) November 13, 2026
Украинските канали за следење на воени активности „Ексиленова плус“ и „Супернова плус“ објавија снимки од пожар и експлозии во рафинеријата „Лукоил-Волгограднефтепереработка“.
Станува збор за една од најголемите рафинерии во Русија, со годишен капацитет за преработка на 15 милиони тони сурова нафта.
На снимките од очевидци се гледа како пламенот од рафинеријата го осветлува ноќното небо, додека се слуша и дејствувањето на руската противвоздушна одбрана. Поради украинските напади врз енергетската инфраструктура, во Русија веќе се воведени ограничувања во снабдувањето со гориво. На видеата од Волгоград се гледаат и граѓани кои по нападот чекаат во редици пред бензинските пумпи.
Гувернерот на Волгоградската област, Андреј Бочаров, потврди дека градот бил цел на „масовен“ напад и дека избиле пожари во јужната индустриска зона.
Рафинеријата во Волгоград е еден од најголемите капацитети во сопственост на „Лукоил“, вториот по големина руски производител на нафта. Украинските сили и на 2 октомври ја нападнаа оваа рафинерија, која се наоѓа на околу 400 километри од украинската граница.
Against the backdrop of the oil refinery still ablaze in Volgograd, convoys are forming to head for Kyiv. https://t.co/Er4JfR4eM1
— Exilenova+ (@Exilenova_plus) November 13, 2026
Украинските дронови го нападнаа и Ростов на Дон, потврди гувернерот на Ростовската област, Јуриј Сљусар.
Според него, по нападите избиле пожари во производствен погон и складиште, додека остатоци од соборени дронови оштетиле станбена зграда.
Украинско беспилотно летало и на 8 ноември го нападна Ростов на Дон, при што беа оштетени мост и енергетски објекти. Поради нападот, во градот беа затворени патишта и прекинато снабдувањето со електрична енергија.
Нападите се случија кратко по нападот на десетици украински дронови врз Москва, во ноќта на 13 ноември. Според руските власти, нападот го нарушил авиосообраќајот на неколку од најголемите аеродроми во московскиот регион.
Украинските Сили за специјални операции (ССО), пак, потврдија дека на 11 ноември ја погодиле и руската рафинерија за нафта во Омск, најголемата во земјата.