Едно лице загина во пукање што се случи вечерва во Будва. По потерата, полицијата лиши од слобода едно лице и пронајде два пиштоли, соопшти Управата на полицијата на Црна Гора.
Според информациите од полицијата, во пукањето се вклучени странски државјани, додека црногорските медиуми пренесуваат дека меѓу инволвираните имало и државјани на Турција.
Во соопштението се наведува дека пукањето било пријавено во дежурната служба на Одделението за безбедност Будва околу 21:10 часот.
По пристигнувањето на местото на настанот, полициските службеници констатирале дека едно лице е мртво. Потоа, полицијата поставила блокади на патиштата и започнала интензивна акција за идентификација и пронаоѓање на сторителите.
За време на потрагата, полицијата пронајде и лишила од слобода едно лице. На местото на настанот биле пронајдени два пиштоли, како и други докази кои би можеле да бидат релевантни за истрагата.
Известен е надлежниот државен обвинител од Вишото државно обвинителство во Подгорица, кој раководи со увидот на лице место и со понатамошните истражни дејствија.