Хакерски групи кои тврдат дека упаднале во рускиот завод за статистика „Росстат“ објавија податоци од изводи од матичните книги на умрените, според кои од почетокот на руската инвазија врз Украина починале меѓу 394.000 и 450.000 лица поврзани со војната.
Групите „Беларусиан Сајберпартизан“ и „Сајлент Кроу“, кои ја презедоа одговорноста за нападот, тврдат дека податоците ги презеле од интерната база на „Росстат“ за демографија. Базата содржи информации од изводи за смрт регистрирани во периодот од февруари 2022 до август 2026 година, објави „Киев Индепендент“.
Украинскиот портал наведува дека не можел да ја потврди автентичноста на податоците ниту проценките на хакерите. „Росстат“ потврди дека од 29 октомври до 1 ноември бил цел на насочени напади, но негира дека базите на податоци биле компромитирани и дека дошло до протекување информации.
„Беларусиан Сајберпартизан“ пресметале најмалку 393.881 смртен случај. Во анализата ги вклучиле само записите во кои како причина за смртта изрично се наведени воени дејствија.
„Сајлент Кроу“ објави повисока проценка – до 450.100 починати, бидејќи ги вклучила и смртните случаи на припадници на војската кои не настанале во борба, како и дел од записите без наведена причина за смртта.
Според украинскиот портал „Милитарни“, најголемата група ја сочинуваат 356.056 записи со шифрата Y36, која во меѓународната класификација на болести означува воени операции.
Уште 38.229 записи се однесуваат на последици од воени операции или содржат опис на смрт во борба, додека 18.291 се означени како смртни случаи во воени операции без наведена шифра за причината.
Вкупниот број на овие три групи изнесува 412.576.
Пошироката документирана бројка изнесува 440.982. Во неа, меѓу другото, се вклучени 14.160 смртни случаи на припадници на војската од болести, сообраќајни несреќи и самоубиства, како и 13.671 смртен случај регистриран во Русија, со наведено место на смртта во Украина или на окупирана територија, но без наведена причина.
Авторите на анализата предупредуваат дека главната шифра за смртни случаи поврзани со војната не прави разлика меѓу војници и цивили. Затоа, дел од бројката може да се однесува и на цивили, вклучително и деца и постари жители на гранатираните места.
Смртните случаи се регистрираат со задоцнување, поради што податоците за последните месеци не се целосни. На крајот на август, базата за 2026 година содржела само 39.296 записи, додека за 2025 година биле регистрирани 182.264.
Хакерите тврдат дека во мрежата на „Росстат“ влегле околу шест месеци пред нападот, кој го извеле во ноќта меѓу 31 октомври и 1 ноември. „Сајлент Кроу“ тврди дека презеле околу 23 терабајти податоци.
„Росстат“ од 2024 година не објавува статистички податоци за причините за смрт.
Русија официјално не го објавува бројот на загинати војници. Рускиот независен медиум „Медијазона“, заедно со руската редакција на Би-би-си и волонтери, до 6 ноември по име потврдил смрт на 285.881 руски војник, со напомена дека реалниот број е значително поголем.