Родителите на 31-годишна жена, која починала по епилептичен напад откако добила совети за намалување на терапијата од чет-ботот ChatGPT, поднесоа тужба против компанијата OpenAI.
Станува збор за Бовен Ван, кинеска софтверска инженерка која живеела во Сиетл. Според наводите во тужбата, таа побарала совет од ChatGPT откако ја изгубила работата во компанијата „Амазон“.
Ван земала лекови против епилепсија, но била загрижена дека терапијата со лекот ламотригин негативно влијае врз нејзината способност да зборува англиски јазик. Тоа ѝ било особено важно бидејќи барала нова работа, а за добивање постојан престој во САД ѝ било потребно повторно вработување.
Според тужбата, чет-ботот комуницирал со неа на кинески јазик и ѝ предложил постепено да ја намалува дозата на лекот, од 400 милиграми до целосно прекинување на терапијата.
ChatGPT наводно ја уверувал дека со намалувањето на дозата „многу веројатно“ ќе ѝ се подобри способноста за течно зборување англиски. Во тужбата се наведува и дека чет-ботот ја советувал да избегнува посети на лекари.
Симптомите се појавиле за време на намалувањето на терапијата
Додека ја намалувала дозата, Ван почнала да чувствува симптоми на фокални епилептични напади. И покрај тоа, според наводите во тужбата, чет-ботот ја уверувал дека нема причина за загриженост.
Таа починала на 12 февруари годинава, како последица на епилептичен напад.
Нејзините родители, кои живееле во Кина и немале вести од неа, отпатувале во Сиетл. На 14 февруари ја пронашле мртва во нејзиниот дом.
Родителите бараат отштета и забрана за медицински совети
Во тужбата родителите тврдат дека OpenAI можела да ја спречи трагедијата доколку во ChatGPT имало соодветни заштитни механизми, особено при комуникација на кинески јазик.
Тие наведуваат дека чет-ботот требало јасно да предупреди дека не е медицинско лице и дека за промена или прекинување на терапијата е неопходна консултација со лекар.
Од компанијата бараат отштета, но и забрана за давање медицински услуги без соодветна лиценца преку нејзините производи.
Портпаролот на OpenAI, Дру Пусатери, за „Њујорк тајмс“ изјавил дека случајот на Бовен е исклучително потресен. Тој посочил дека таа користела верзија на ChatGPT која повеќе не е во употреба, додавајќи дека поновите верзии поефикасно препознаваат ситуации во кои е потребна итна медицинска помош.
Случајот е најнов во низата судски спорови во кои тужителите тврдат дека советите добиени од чет-ботови придонеле за сериозни последици, вклучително и смртни случаи.