Татко, чиј двегодишен син падна од прозорец на хотел на четвртиот кат во Кипар е казнет со 3.000 евра за предизвикување смрт на детето.
Џошуа Фостер мислел дека прозорецот е затворен кога го крена синот на прагот од прозорецот за да му го покаже погледот кон водениот парк.
Во тој момент, како што претходно беше утврдено во Окружниот суд во Пафос, тој „изгуби контрола“ врз детето, пренесува Би-Би-Си.
На 12 јули, момчето падна од височина од речиси 12 метри во луксузниот хотел „Кинг Евелтон Бич“. Тоа беше првиот ден од семејниот одмор во Хлоракас.
Англичанецот Фостер (37) се изјасни за виновен за предизвикување смрт преку невнимателно, непромислено или опасно однесување. Пресудата му беше изречена утрово.
По изрекувањето на казната, тој им рече на новинарите: „Ви благодарам за поддршката. Едвај чекам да се вратам дома и да поминам време со сопругата и ќерката“.
Фостер, кој работи како ревизор, пристигна во Кипар неколку часа пред несреќата, заедно со сопругата, двете деца и членови од семејството на сопругата.
Семејството уживаше во разни активности и пливање. Околу 18:00 часот, Фостер се упати кон лифтот со синот, кога момчето го забележа водениот парк пред хотелот.
Фостер го притисна копчето за лифтот и го остави детето на прагот од прозорецот. Пред да успее да реагира, се случи нешто што на суд беше опишано како „незамисливо“. Момчето беше пренесено во Општата болница во Пафос, каде што подоцна беше констатирана смрт.
– Судејќи според изгледот, на прозорецот немаше никакви ознаки што би го предупредиле обвинетиот дека еден негов дел е отворен – изјави окружниот судија Фросо Христодулиду.
Таа додаде дека пропустот на Фостер да провери дали прозорецот е затворен довел до трагичниот исход.
– Станува збор за момент на невнимание што создаде опасна ситуација со фатални последици – нагласи судијката.
Според преводот на записникот од судењето, таа исто така истакна дека „не постојат докази оти обвинетиот намерно го изложи детето на опасност“.
Таа напомена дека ниту една казна не може да биде потешка од „последиците од губењето на сопственото дете“.
Фостер ѝ изјави на полицијата дека неговиот син падна од прагот на прозорецот пред тој да успее да го фати. Иако во неговиот организам имаше алкохол, тоа не одиграло значајна улога во постапката против него.
Неговиот адвокат тврдеше дека ниту еден доказ не укажува на тоа дека тој бил пијан.