СДСМ обвини дека директорката и помошник-директорот на Регионалниот центар за стручно образование и обука „Ѓорѓи Наумов“ од Битола се коцкале во казино во Монте Карло за време на ученичка екскурзија, додека малолетните ученици ги чекале во холот.
На прес-конференција, Јованче Манасков, претседател на Комисијата за образование и наука на СДСМ, изјави дека станува збор за директорката Жанета Сервини и помошник-директорот Љупчо Здравковски. Според партијата, тие играле на слот-машини додека учениците биле под нивна одговорност.
Манасков рече дека СДСМ располага со видеа и фотографии од настанот, од кои едно видео ќе биде објавено со заматени ликови поради тоа што на него има малолетници.
Од СДСМ побараа министерката за образование и наука Весна Јаневска итно да изврши надзор и да поведе постапка за утврдување одговорност и разрешување на инволвираните.
„Одговорноста во образованието не е привилегија, туку обврска“, порача Манасков.