Полицијата вчера попладне го привела 20-годишниот Б.А. од Студеничани, кој бил баран со судска наредба за издржување двегодишна затворска казна.
Како што информира МВР, на 24 август во 17:25 часот во селото Морани, скопско, полициски службеници од Единицата за интервентна полиција при СВР Скопје го привеле Б.А.
Претходно, тој управувал автомобил „фолксваген голф“ со скопски регистарски ознаки и не застанал на знак за запирање даден од полицајците.
Набргу потоа, со возилото удрил во бетонски ѕид, а при движење наназад удрил и во возило „шкода јети“ во сопственост на МВР.
По приведувањето биле извршени дополнителни проверки, при што било утврдено дека Б.А. бил баран за издржување казна затвор во траење од две години за кривични дела предвидени во членовите 292 и 288 од Кривичниот законик.
Лицето ќе биде спроведено во надлежната казнено-поправна установа за издржување на казната.