Украинските сили во текот на ноќта го нападнаа рускиот Краснодарски крај, а според објави на руски Телеграм-канали, цел била рафинеријата за нафта „Афипски“, една од најголемите рафинерии во јужниот дел на Русија. По серијата експлозии во областа на рафинеријата избувнал голем пожар.
На снимки објавени од локални жители, наводно, се гледа голем пожар кој се шири од подрачјето на рафинеријата. Во текот на нападот во регионот била прогласена воздушна тревога.
Ukrainian attack drones reportedly struck Russia’s Afipsky oil refinery early this morning, setting it on fire. pic.twitter.com/h2jVYzpL5M
— OSINTtechnical (@Osinttechnical) August 25, 2026
Руските власти засега не соопштија што точно било погодено, ниту колкава е причинетата материјална штета. Не е познато ниту со какво оружје бил изведен нападот.
Украинската војска досега не го коментираше нападот.
Рафинеријата „Афипски“ произведува бензин, дизел, гасни кондензати, тешки нафтени деривати и сулфур.
Годишно може да преработи околу 6,25 милиони тони сурова нафта, што претставува околу два отсто од вкупните рафинериски капацитети на Русија. Објектот и претходно бил мета на украински напади. Во јуни, по напад со дронови, и таму избувнал пожар.
Украина во последните години редовно напаѓа руски рафинерии и друга енергетска инфраструктура со далекусежни дронови. Целта е да се наруши снабдувањето на руската армија со гориво и да се намалат приходите со кои Москва го финансира војувањето против Украина.
Во текот на ноќта руската противвоздушна одбрана дејствувала и во близина на рафинеријата „Новошахтинск“ во Ростовската област. Засега нема потврдени информации за штета на тој објект.
Украинските сили во последните денови повторно ги засилија нападите врз цели длабоко на руска територија. Покрај енергетските објекти, на мета се и големи логистички центри, меѓу кои и објекти на руските трговски компании „Вајлдберис“ и „Озон“.