Силно невреме вчера зафати повеќе делови од Германија, при што беше предизвикана голема материјална штета, а во градот Фирстенвалде, во покраината Бранденбург, е потврдено и торнадо, објави „РНД“.
„Настанот во Фирстенвалде несомнено беше торнадо“, потврди Германската метеоролошка служба (ДВД).
#Fürstenwalde #LOS #Tornado pic.twitter.com/Mh0wDAnNx6
— stepke (@stepke843363) August 19, 2026
Силниот ветер соборил бројни дрвја, а на еден објект му бил откорнат покривот. Пожарникари и полицајци интервенирале до доцна во ноќта.
Најтрагично поминало во Валдорф, во Рајнска Област-Пфалц, каде што 58-годишна жена загинала откако врз засолништето во кое се наоѓала паднало дрво.
Жената и 47-годишна придружничка побарале засолниште под наткриен дел со клупи кога невремето искорнало дрво, кое паднало врз конструкцијата.
Постарата жена починала на местото на настанот, додека другата била тешко повредена и пренесена во болница.
Сериозна штета е регистрирана и во областа Вестервалд. Во Хер-Гренцхаузен биле урнати делови од ѕидови на најмалку две згради, а низ поширокото подрачје биле искорнати голем број дрвја.
Во Банбершајд, силниот ветер однел делови од фасадата на спортската сала „Аубахале“. Имало и големи прекини во снабдувањето со електрична енергија, а службите интервенирале на повеќе од 100 места.
На автопатот А61 силните налети на ветерот превртеле камион.
Невремето предизвикало штета и во Хесен. Во областа Лан-Дил биле оштетени околу 60 куќи. На дел од објектите биле откорнати ќерамиди, додека други останале без цели покриви. Некои делови од покривите биле однесени и до 100 метри од куќите.
Германската метеоролошка служба претходно предупреди на силни невремиња, особено во северниот дел на Рајнска Област-Пфалц. Предупредувањето подоцна било укинато.
Торнадата се релативно ретки во Германија, но во последните години се регистрираат сè почесто. Минатата година во земјата биле потврдени 46 торнада.