Пациентите на кои им е потребен лекот „Фостер“ повторно ќе можат да го подигнат од аптеките без дополнителна доплата, информира Министерството за здравство.
Од Министерството велат дека се известени од компанијата – носител на одобрението за ставање во промет на лекот „Фостер“, кој се наоѓа на Позитивната листа на лекови, дека се направени промени во интерес на пациентите.
„Почнувајќи од овој месец, осигурениците повторно ќе можат да го подигнат лекот од аптеките без доплата, односно само со плаќање на законски утврдената партиципација за услугата по рецепт“, соопшти Министерството.
Истото, како што појаснуваат од Министерството, важи и за другите лекови што ги содржат истите активни компоненти и се користат во третманот на хроничната опструктивна белодробна болест (ХОББ).
Од Министерството додаваат дека во континуитет се спроведуваат активности за обезбедување поголема достапност на лековите и нивна достапност по поприфатливи цени за пациентите.