Портпаролот на ВМРО-ДПМНЕ, Валентин Манасиевски, обвини дека СДСМ, Левица и ДУИ се одговорни за недонесувањето на Изборниот законик и оцени дека тоа претставува блокада на државниот напредок.
Според Манасиевски, измените на Изборниот законик требало да бидат усвоени не само по барање на политичките партии, туку и заради вградување на препораките на ОБСЕ и ОДИХР, како и поради обврските од Реформската агенда.
„Девет од десет реформи се исполнети, а таа една што останува е директна вина на коалицијата на СДС, Левица и ДУИ“, изјави Манасиевски.
Тој додаде дека опозициските партии не се заинтересирани за усвојување на нов Изборен законик, туку, како што рече, сакаат на следните избори да се претстават како оштетени поради тоа што законот не бил донесен.
Манасиевски истакна дека поради истекувањето на рокот за усвојување на Изборниот законик, државата ризикува да остане без дополнителни средства од Планот за раст. Тој предупреди дека доколку не се постигне договор, следните избори ќе се одржат според постојниот Изборен законик.