Палестинската милитантна група Хамас одлучи да го распушти телото кое управуваше со Појасот Газа речиси две децении, соопштија денес претставници на движењето.
Владиниот Комитет за вонредни ситуации објави дека неговото раководство поднело оставка и е подготвено целосно да го предаде управувањето на Националниот комитет за администрација на Газа (NCAG), објави Ал Џезира.
Во соопштението се вели дека одлуката е донесена во интерес на палестинскиот народ во Газа, објаснувајќи дека поради продолжувањето на војната, блокадата, доцнењето во реконструкцијата и одбивањето на Израел да се повлече од територијата, потребно е да се обезбеди ново административно решение.
Комитетот соопшти дека подготовките за пренос на власта се завршени и ги повика медијаторите да извршат притисок за да може NCAG да влезе во Газа што е можно поскоро и да почне да ги извршува своите должности, што, како што рече, ќе придонесе за зајакнување на отпорноста на населението и ублажување на последиците од војната.
Претставник на Хамас, кој не сакаше да биде именуван, рече дека движењето одлучило да го распушти владиниот комитет во Газа и да назначи личност прифатлива за сите палестински партии да ја надгледува неговата работа додека Националниот комитет за управување со Газа формално не ја преземе функцијата, објави весникот „Авсат“.
Друг претставник на Хамас рече дека движењето веќе ги информирало другите палестински фракции за одлуката за време на неодамнешниот состанок во Каиро.
Според него, палестинските фракции ја поздравиле одлуката на Хамас и ја сметале за сериозен чекор кон дозволување на Националниот комитет да ја преземе контролата врз Газа.
NCAG е основан од Мировниот комитет, тело формирано од американскиот претседател Доналд Трамп откако тој посредуваше за прекин на огнот меѓу Хамас и Израел минатиот октомври.
Хамас и другите палестински фракции одржаа неколку рунди разговори во Каиро со меѓународни посредници за да се обидат да ги надминат разликите, особено околу втората фаза од договорот за прекин на огнот во Газа.
Првата фаза од договорот вклучуваше ослободување на последните израелски заложници што ги држеше Хамас во замена за Палестинците притворени во Израел.
Преминувањето кон втората фаза, која треба да вклучува разоружување на Хамас и постепено повлекување на израелските сили од Газа, е во застој со месеци.
Во меѓувреме, израелската војска дополнително го прошири своето присуство во Газа и, според изворите, презеде контрола врз речиси 70 проценти од територијата, објави весникот.
Од друга страна, Хамас бара воспоставување палестинска администрација пред да размисли за предавање на какво било оружје.
Хамас владее со Газа откако ја презеде контролата врз палестинската територија од ривалот Фатах во 2007 година.
Прашањето за тоа како да се управува со Газа по завршувањето на војната останува главна точка на сопнување во преговорите за спроведување на втората фаза од договорот за прекин на огнот.
Израел ја отфрли можноста Хамас да се врати на власт во Газа, но ја отфрли и можноста Палестинската самоуправа, со седиште во Рамала, да ја преземе територијата.