Кинескиот премиер Ли Кјанг изјави дека Кина влегува во нова фаза на економски развој која, покрај домашниот напредок, отвора нови можности и за глобалната економија, нагласувајќи дека земјата ќе остане посветена на политиката на отвореност и меѓународна соработка.
На отворањето на 17. Годишен состанок на новите шампиони на Светскиот економски форум, познат како Летен Давос, во Далијан, Ли го претстави концептот „China Opportunity 2.0“, оценувајќи дека денешниот развој на Кина се темели не само на големиот домашен пазар и конкурентното производство, туку и на технолошките иновации, индустриската модернизација и висококвалитетниот економски раст.
Според него, новата развојна фаза носи нови можности за компаниите ширум светот преку поголеми инвестиции, пристап до напредни технологии и подлабока интеграција со кинеската економија.
„Кина останува посветена на отворен пристап кон иновациите. Голем дел од технолошките достигнувања се развиваат како отворени платформи, што им овозможува и на земјите во развој полесен пристап до современи технологии и производи“, изјави Ли.
Тој ги отфрли оценките за таканаречениот „China Shock 2.0“, според кои брзиот технолошки и индустриски развој на Кина претставува закана за глобалната економија, оценувајќи дека кинеските иновации создаваат можности за заеднички развој, а не нови поделби.
Осврнувајќи се на економските резултати, премиерот истакна дека, и покрај неизвесностите во светската економија и забавениот глобален раст, кинеската економија покажува стабилност, отпорност и силен иновативен потенцијал. Според него, почетокот на 15. петгодишен план за периодот 2026–2030 година ќе обезбеди дополнителен поттик за модернизација и економски развој.
На одделна средба со околу 150 претставници на компании од повеќе од 30 држави и региони, Ли порача дека Кина ќе продолжи да ја продлабочува меѓународната трговска и инвестициска соработка и да создава поотворена, поправедна и поповолна деловна средина за странските инвеститори.
Тој нагласи дека модернизацијата на кинескиот пазар, производството и инфраструктурата ќе отвори дополнителен простор за раст на меѓународните компании и ќе придонесе за поефикасен индустриски екосистем.
Позитивни оценки за деловната клима во Кина дадоа и учесници на форумот. Главниот извршен директор на норвешката компанија „Aker BioMarine“, Матс Јохансен, изјави дека Кина претставува стабилен и предвидлив пазар во време на глобална неизвесност. Тој посочи дека кинескиот пазар учествува со околу 20 проценти во вкупната продажба на компанијата и е нејзиниот најбрзо растечки пазар.
„Ако сакате да инвестирате во иднината, треба да инвестирате во Кина. Ако сакате да бидете поврзани со светот, треба да бидете дел од кинеските иновации и синџирите на снабдување“, изјави Јохансен.
Слична оценка даде и Лука Форте, директор за синџири на снабдување во италијанската компанија „Eldor“, кој истакна дека Кина остава силен впечаток со брзината на развој на новите технологии и со ефикасноста во нивната примена во индустријата.